Miguel Suárez Abel (San Estevo do Campo, Arzúa, 1952). Licenciado en Psicoloxía, exerce como profesor de Ensino Secundario no Insituto Luís Seoane de Pontevedra. Colaborador de radio e prensa (na actualidade en El Correo Gallego, Diario de Pontevedra e El Progreso), deuse a coñecer como escritor a principios dos anos oitenta cando o premiaron no concurso Modesto R. Figueiredo por tres relatos curtos: O fillo do Serafín (Accésit no 1981), O Quiquiriquí (primeiro premio no 1982) e A alemana (finalista no 1986). Gañar o Premio Blanco Amor coa novela Turbo (1988) resultou un paso significativo na súa evolución. Posteriormente publicou Álvaro Pino (1989), Sabor a ti (finalista do Premio Xerais en 1991), Selva Negra (1993) e participou con relatos en libros colectivos como Contos do Castromil (1992), Unha liña no ceo (1996), Novo do trinque (1997), Contos dende a arquitectura (Colexio de Arquitectos de Pontevedra, 2003). No ano 2001 recibe o Premio Nacional de Periodismo Julio Camba. No 2002 gana o Premio de Novela por entregas de La Voz de Galicia por O repenique de Beatriz Goldar (Ir indo, 2003). E no ano 2007 recibe o Premio Periodístico Puro Cora.