No acto, participarán a ilustradora do libro, a alcaldesa de Moaña, Leticia Santos Paz, Aldán Santamarina, concelleiro de normalización lingüística, e Francisco Castro, director xeral de Editorial Galaxia.
Velaquí o acontecemento literario do ano, o libro inédito de Xela Arias. Non te amola! amósanos a primeira achega á narrativa da escritora, unha muller multidisciplinar, moderna absoluta que se caracterizaba polo seu carácter rompedor. Unha persoa cunha forza intempestiva. Así é como a retrata a súa biógrafa Montse Pena Presas, en Intempestiva. Unha biografía de Xela Arias.
Agora na primavera fixen nove anos. Son moitos para non procurar nada de proveito na vida, así que vou escribir un libro. Este é o comezo desta fantástica biografía emocional na que Xela amosa unha sensibilidade asombrosa. A autora deixa ver nestas páxinas moitos rasgos da súa propia personalidade, revelando neste libro un prototipo de muller moi vangardista e actual.
A narración está acompañada polo fermoso traballo de ilustración de Luz Beloso, o que fai desta publicación unha alfaia da literatura. Unha lectura imprescindible.