Presentación de “En tempo de desconto”, en Betanzos

Categoría: Nova

O martes 7 de xuño, celebrarase, ás 19:30 h, na libraría Biblos de Betanzos, a presentación de En tempo de desconto, de Xosé Ramón Pena, organizada pola Asociación Lar de Unta.
Acompañando o autor, estarán Chus Ansede (Lar de Unta) e Tati Mancebo, directora Comercial de Editorial Galaxia.
Atopámonos perante un autor que pertence á mellor tradición de contistas do noso país. A súa obra está caracterizada por ser literatura de altura. Este libro de relatos, publicado na colección Literaria, é a confirmación diso, e de que estamos diante dun dos mellores narradores das letras galegas.
Esta obra, de alta calidade, está conformada por un mollo de historias que poderían ser en si mesmas partes dunha novela que as transita e atravesa e onde os personaxes, atrapados na vida, atropelados por ela, gobernan como mellor poden o seu destino. Coma as vías dun tren que nos leva, pero que non se sabe cara a onde, os que viven nestas historias veranse guiados por horizontes sorprendentes e inesperados que lles farán aceptar derrotas, gañar batallas e, en definitiva, vivir.
A escrita de Xosé Ramón Pena fainos viaxar, ademais, por un pasado posible, non por ficcionado menos verdadeiro. Un libro perfecto nos seus tempos, no soño ao que nos convida e polo xogo que, palabra a palabra, maxia da linguaxe, nos propón e nos reta.
Xosé Ramón Pena (Betanzos, 1956) é narrador, ensaísta e historiador da literatura. Asemade é colaborador habitual en prensa e asesor literario do suplemento “Faro da cultura”.

No espazo da ficción é autor de novelas e volumes de relatos: O reverso do espello (1984), Para despois do adeus (Premio Xerais, 1987), Paixóns privadas (1991), A era de Acuario (1997), Fado de princesa(2005), A batalla do paraíso triste (2008), Como en Alxeria (2012) e Todas as vidas (2020). Polo que se refire ao ensaio e á historia da literatura, publicou, entre outros títulos, Manuel Antonio e a vangarda(1996), Historia da literatura medieval galego-portuguesa (2002), Martín Codax e os xograres do Mar de Vigo (2017) e os catro volumes que conforman a Historia da literatura galega (2013-2019).

Comparte nas túas redes sociais ou por email