Pilar Sampil Licenciada en Económicas pola Universidade de Santiago.
Toda a súa actividade profesional está ligada ao sector da edición (Editorial Galaxia), no que traballa desde o ano 1984.
Compaxina a xestión económica coa creatividade e a acción cultural.
A súa paixón son os álbumes ilustrados, a música e a danza tradicional, o que a ten levado a implicarse en diferentes iniciativas neste eido durante longos períodos de tempo.
Formou parte da directiva de GALIX (Asociación Galega do libro Infantil e Xuvenil) na súa primeira etapa de implantación en Galicia.
Tamén estivo na directiva da Asociación Galega de Editores, participou na posta en marcha da Asociación Culturgal e na organización da primeira feira Culturgal celebrada no Pazo da Cultura de Pontevedra.
É membro activo, entre outras, da Asociación Monteira Grupo de Danzas do Mundo, desde o ano 1996.