Kazuo Ishiguro Kazuo Ishiguro (Nagasaki, Xapón, 8 de novembro de 1954) naceu no Xapón pero con apenas seis anos trasladouse a Londres onde segue a vivir na actualidade. As súas novelas caracterízanse por unha psicoloxía da angustia e o recordo do pasado, con escasos personaxes e un fío argumental débil, moi ao modo oriental. Tras publicar varios relatos e artigos en revistas, publicou a súa primeira novela en 1982, A Pale View of the Hills, pola que gañou o premio Winifred Holtby. A seguinte novela, An Artist of the Floating World (1986), valeulle o premio Whitbread de Literatura. The Remains of the Day (1989), levada ao cine por James Ivory, consagrouno definitivamente e por ela recibiu o Booker Prize 1989.