Antonio Yáñez Antonio Yáñez Casal vive en Ferrol, cidade na que naceu no ano 1959. Boa parte das súas vivencias están tamén ligadas á vila de Cariño, de onde é a súa familia. No eido da literatura foi por dúas veces finalista do Premio Raíña Lupa de literatura infantil e xuvenil, convocado pola Deputación Provincial da Coruña; a primeira na edición do ano 2000 coa obra Don Cosme e o telegrama amarelo, publicada en 2004, e a segunda, na edición do ano 2004 con Crisóstomo o alifáfaro, publicado por Galaxia en 2006. Así mesmo, en 2005 foi finalista do Premio Merlín de literatura infantil e xuvenil, convocado por Edicións Xerais, con Natasha e Dimitri.

Finalmente con Viaxe a Libunca, publicada por Galaxia, obtivo o premio Raíña Lupa 2006.