Grial 192

VV.AA.

Príncipe das letras. Cen anos con Álvaro Cunqueiro

O ano Álvaro Cunqueiro cérrase con este número de GRIAL (192) dedicado ao autor de Mondoñedo. Cérrase ou ábrese, segundo queiramos velo, pois o pasado 22 de decembro cumpríronse cen anos do nacemento do escritor e 2012 é o primeiro ano do seu centenario. Da man de Dolores Vilavedra e Víctor F. Freixanes, GRIAL preparou un número no que se recollen traballos de Manuel Forcadela (para unha nova lectura da poesía de Cunqueiro), María Liñeira (arredor de Don Hamlet cunqueirián), Xosé Manuel Dasilva, que continúa cos seus traballos sobre as relacións dos escritores galegos coa censura franquista, Fernando Valls (Cunqueiro en castelán) e César Cunqueiro que explora novas interpretacións da narrativa nun ensaio que é un adianto dun libro máis ambicioso que está a preparar sobre a obra do seu pai.

A maiores, Xosé-Henrique Costas e Iago Castro presentan e comentan "poemas esquecidos anteriores a 1933". Estes dous profesores son autores da segunda entrega da poesía completa en galego de Álvaro Cunqueiro (1933-1981) que vén de publicar Galaxia dentro das conmemoracións do pasado ano (Biblioteca Álvaro Cunqueiro. Literaria).

O número inclúe a derradeira entrevista que concedeu Cunqueiro, pouco antes de morrer. Cunqueiro faleceu na cidade de Vigo o 28 de febreiro de 1981, e a entrevista que reproducimos é do 5 de xaneiro. O seu autor, César Morán, profesor, ensaísta, músico e poeta, traballaba daquela na obra do autor de "Merlín e familia" e visitouno para completar a información dos seus estudos. O resultado é unha fermosa entrevista, clarificadora, aberta, con humor e erudición, arredor do universo cunqueirián e coa participación de familiares e amigos que o visitan.

César Morán é autor tamén do libro/disco "Haberá primavera" (Galaxia, 2011), no que recolle e pon música a catorce composicións poéticas de Álvaro Cunqueiro e no que se reproduce tamén, nun segundo CD, a entrevista que transcribimos neste número de GRIAL.

Ademais das seccións habituais da revista (Rego da Cultura, Libros, Creación, Crónicas), en Temas de Noso Tempo, recollemos un traballo do ensaísta, politólogo, catedrático emérito da Universidade de Praga, Miroslav Hrosck, sobre as nacións en Europa: "Para que precisamos aínda a nación en Europa?", e un ensaio do sociolingüísta portugués Fernando Venancio, "O indesejado ditongo âo". Continuamos deste xeito con cuestións que vimos tratando en números anteriores da revista e sobre os que incorporamos novas achegas.

O escritor Xavier Alcalá lembra na sección Documentos a unha das figuras máis interesantes e menos coñecidas das letras galegas, Ernesto Guerra Dacal (1911-1994), ferrolán, que faleceu en Lisboa, estudoso da obra de Federico García Lorca, e ao que Alcalá tratou especialmente. Guerra Dacal foi seguramente a persoa que máis influiu na redacción dos 6 poemas en lingua galega de Lorca, editados en Nós en 1936.

Para rematar, Javier Jurado Luque, musicólogo, sorpréndenos e ilústranos sobre un tema interesante e ben pouco coñecido: a zarzuela en lingua galega e as Irmandades da Fala, nas primeiras décadas do pasado século XX.

Recensións


Detalles

  • Páxinas : 156
  • Deseño : Rústica
  • Dimensións : 185 x 270 mm.
  • Data Publicación : 2012-01-19
  • Colección : Grial
  • Editorial : Galaxia
  • ISBN :
  • Edición : 1

Noticias relacionadas



Actividades relacionadas


Novidades

a-fita-azulA fita azulMon G. Buhigas
os-amorodos-de-bergmanOs amorodos de BergmanFernando Redondo Neira

VV.AA.

VV.AA.,


Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR