Grial 177

VV.AA.

Desafíos da educación

O que propoñemos neste número de GRIAL é unha reflexión sobre o sistema, as estratexias, mesmo nalgún caso as políticas educativas na nosa sociedade contemporánea, primeiro: considerando que a educación segue a ser un dos grandes mecanismos de socialización; segundo: que en ningún caso é un mecanismo neutral, nin inocente, senón que responde aos intereses dominantes; e terceiro: presentando interrogantes, incertezas ou desafíos propios do tempo histórico que nos toca vivir, isto que chamamos a Sociedade da Información e do Coñecemento ou Era da Globalización.

O profesor Xan Bouzada, membro do Consello de Redacción de GRIAL, deseñou as liñas básicas deste número, que titulamos "Desafíos da educación". Desafíos porque, irremediablemente, cada tempo presenta a súa realidade, que cómpre saber enxergar: conxunto de problemas, situacións, novas circunstancias e, xa que logo, novas oportunidades. Nas páxinas que seguen, os colaboradores de GRIAL abordan cuestións que nos afectan e que mesmo vivimos aceleradamente aqueles que dun xeito ou doutro estamos vencellados á docencia.

Nada é inocente no sistema. Nin os currículos, nin os contidos, nin os programas, nin os espazos físicos onde se desenvolve a práctica educativa. Tampouco os recursos (case sempre escasos), nin os métodos, nin a comunidade escolar, nin o conxunto da sociedade, que lle pide á escola ou intenta descargar na escola frustracións, eivas e demandas que en ningún caso esta pode resolver en exclusiva ou de xeito unilateral. Pensemos a educación. Pensémola xuntos, conscientes da enorme significación que o capital humano representa. Pensémola, sobre todo, ollando cara ao futuro, nos desafíos que o século nos ofrece.

A maiores, neste número de GRIAL recollemos algúns outros traballos a salientar. Tal como anunciamos, Albino Prada continúa e complementa a súa entrega sobre as "Causas e custos da dispersión", reflexión que nos enfronta á configuración do territorio e ás características da poboación, equipamentos e servizos, perante as necesidades do desenvolvemento (económico e social).

Henrique Monteagudo aborda a figura histórica de Ramón Piñeiro (1915-1990), un dos fundadores de Editorial Galaxia, dende a análise das estratexias que o intelectual galeguista e o seu grupo desenvolveu a prol da lingua galega durante a ditadura. O interese pola significación política e intelectual de Piñeiro, como principal estratega do galeguismo nun determinado momento histórico, abofé que ha de medrar co tempo, e o ensaio de Monteagudo apunta nesta dirección. Coincide coa
saída das primeiras entregas da Biblioteca de Autor Ramón Piñeiro (Editorial Galaxia).

Dous ensaios e unha longa entrevista cerran esta entrega: Francisco Díaz-Fierros Viqueira viaxa ao século XVII e evoca a figura de Tomás de Lemos, frade dominico que aparece asinando, xunto con outros once, o informe do Santo Oficio que dá
orixe ao proceso contra Galileo Galilei. Un capítulo abondo coñecido da historia da Ciencia, mais sempre estremecedor e sorprendente. Daniel Soutullo, pola súa banda, apunta relacións entre a bioloxía e a vida artificial. A entrevista, que tamén
anunciabamos no anterior número da revista, propón un diálogo entre dous artistas da fotografía: o tamén escritor e poeta Vítor Vaqueiro (entrevistador) e Manuel Vilariño, recente Premio
Nacional de Fotografía (entrevistado).

Recensións


Detalles

  • Páxinas : 148
  • Deseño : Rústica
  • Dimensións : 18,5 x 27 cm.
  • Data Publicación : 2008-05-05
  • Colección : Grial
  • Editorial : Galaxia
  • ISBN :
  • Edición : 1

Noticias relacionadas



Actividades relacionadas


Novidades

prana-apanaPrana ApanaPatricia Rivas Gallego
9788491514473O derradeiro libro de Emma OlsenBerta DávilaPablo Prado
9788491514589O país do porvirXoaquín Fernández Leiceaga

VV.AA.

VV.AA.,


Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR