Cadernos Grial. As caras do libro. Homenaxe a Xohán Ledo. Nadal 2006

VV.AA.

O Caderno GRIAL correspondente a Nadal 2006 está dedicado a un dos grandes artistas do libro: Ricardo García Suárez (Xohán Ledo), a quen Galaxia dedica unha atención especial neste número extraordinario. Unha viaxe pola biografía e a obra dun dos máis significativos creadores da edición galega.

Xohán Ledo asumiu a imaxe gráfica da Editorial Galaxia dende 1950 ata ben andada a década dos 80. As súas cubertas, o deseño interior dos libros, as ilustracións das coleccións de Galaxia adquiren nese período unha significación especial. Xunto con Luís Seoane no exilio, Xohán Ledo é o gran innovador da imaxe gráfica do libro en lingua galega.

O Caderno GRIAL está dedicado á personalidade e á obra deste artista gráfico, médico de profesión, que dende o primeiro momento formou parte do equipo de dirección e xestión da editora. Francisco Fernández del Riego e Xaime Isla Couto, os seus compañeiros de edición nesta época, abren o número con sendas lembranzas. Gustavo Garrido percorre a biografía do autor, cunha mostra de documentos gráficos procedentes do album familiar (familia García Alonso). Víctor F. Freixanes propón un repaso representativo das "caras do libro" dende a Idade Media ata os nosos días, e Xosé Díaz, Manuel Janeiro e Uqui Permui colaboran con ensaios sobre a obra de Xohán Ledo e as características da edición gráfica do libro. Fausto Isorna inclúe unha fermosa homenaxe gráfica.

Trátase de presentar aos lectores de GRIAL a personalidade dun dos grandes creadores do libro galego moderno, pouco coñecido do gran público, en parte pola súa discreción e a súa humildade. Da súa autoría é o oleo onde aparecen os compoñentes do primeiro equipo de xestión da editora: Rufo Pérez, Emilio Álvarez Blázquez, Luís Viñas Cortegoso, Francisco Fernández del Riego, Antón Beiras García, Xaime Isla Couto, Xosé Meixide González e o propio autor, que se retrata a si mesmo de costas, agachando o rostro.

Xohán Ledo non só foi un magnífico portadista. Da súa man xurdiron as imaxes plásticas de GRIAL, as primeiras cubertas de Cunqueiro e de Ánxel Fole, de Eduardo Blanco Amor ou de Otero Pedrayo, a colección Illa Nova, onde se daba cabida aos novos autores, etc. Tamén foi un inspirado grafista de folletos, almanaques, cartaces, etc. Seus son os primeiros carteis do Día das Letras Galegas, por exemplo. Debuxante, gravador, pintor… O lector poderá coñecer a obra plástica do autor, depositada na actualidade en coleccións familiares e privadas, así como nalgúns poucos museos: Fundación Fernández del Riego, Museo Carlos Maside de Sada, etc.

Incluímos tamén unha mostra de ensaios e do pensamento de Xohán Ledo, cunha interesantísima entrevista que Cosme Barreiros (pseudónimo de Fernández del Riego) publicou na revista Galicia emigrante en febreiro de 1956, revista que dirixía o seu amigo Luis Seoane en Buenos Aires. Na cuberta do Caderno GRIAL recreamos un dos oleos do pintor: a lectura.

Recensións


Detalles

  • Páxinas : 84
  • Deseño : Rústica
  • Dimensións : 18,5 x 27 cm
  • Data Publicación : 2007-02-16
  • Colección : Cadernos Grial
  • Editorial : Galaxia
  • ISBN : 978-84-8288-681-7
  • Edición : 1

Noticias relacionadas



Actividades relacionadas


Novidades

9788491514053Atranco no bancoManuel Núñez Singala
9788491514060A sombra das árboresAna Abad de Larriva
9788491514015Os jeans de MaríaLois Alcayde Dans
9788491514046CarruselBerta Dávila

VV.AA.

VV.AA.,


Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR