A carpa que acolle as presentacións de libros na Feira da Coruña quedou pequena para acoller o público que se achegou a acompañar a Dores Tembrás e Xosé Tomás na presentación, canda o escritor e editor Francisco Castro, do libro 'O peizoque Roque'. A expectación foi tanta que, rematado o acto, autora e ilustrador tiveron que instalarse nun espazo fóra da carpa para, durante unha hora, seguir asinando exemplares e repartindo galletas con palabras de chocolate que Dores Tembrás se encargou de traer para alimentar aos lectores e lectoras co mesmo agarimo que o Peizoque se alimenta de palabras nesta historia agora publicada na colección Os Duros.
Tralas protocolarias verbas de presentación, Dores Tembrás e Xosé Tomás contaron a historia do Peizoque previo reparto entre algúns dos nenos e nenas presentes, dalgunhas das palabras que no conto van enchendo ao peizoquiño. Así, mentres a autora contaba, o ilustrador, diante dos nosos sorprendidos e divertidos ollos, puña imaxes ao tempo que ambos os dous interactuaban co público infantil.
Un serán inesquecible para Dores Tembrás, Xosé Tomás e o Peizoque Roque. E para todos e todas os que alí estivemos.
No noso blog deixamos un álbum de fotos desta feliz, poética e alimenticia xornada.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR