Na mañá do xoves, o Museo do Pobo Galego acolleu a presentación á prensa da actividade Canta, miña pedra, canta, coa que a Secretaría Xeral de Política Lingüística da man da Editorial Galaxia pon en marcha unha nova edición do programa de dinamización da lingua galega FalaRedes. A presentación tivo lugar ademais aproveitando o gallo do Día Mundial da Poesía e do Día Internacional da Narración Oral, por tratarse dunha actividade que parte de poemas tradicionais recollidos por Antonio Fraguas, a quen se lle dedicará o vindeiro Día das Letras Galegas.

Xunto co secretario xeral de Política Lingüística, Valentín García, participaron na presentación de Canta, miña pedra, canta Justo Beramendi, presidente da Fundación Antonio Fraguas Fraguas; Francisco Castro e Xulio Amigo, director xeral e director comercial de Editorial Galaxia, respectivamente; Charo Pita, actriz e contadora, e Xoán Curiel, músico, que interpretou para os asistentes unha das cancións que forman parte do espectáculo.

Tras o seu éxito con Estamos no verán!!! e con A casa do terror, Xoán Curiel volve ao FalaRedes acompañado desta volta da actriz, escritora e contadora Charo Pita. Faino cunha actividade dirixida a nenos e nenas de 6 a 12 anos e ás súas familias que xira arredor dos relatos populares galegos e mais de cancións que don Antonio Fraguas, a quen este ano se lle dedica o Día das Letras Galegas, recolleu nas súas Aportacións ao Cancioneiro de Cotobade. O espectáculo, que abre a edición 2019 do programa de dinamización lingüística FalaRedes, forma parte da programación institucional que a Xunta de Galicia desenvolve para celebrar as Letras Galegas e honrar o intelectual arredor do que xirará o vindeiro 17 de maio.

Canta, miña pedra, canta percorrerá esta primavera, baixo xestión da Editorial Galaxia, 14 concellos da Rede de Dinamización Lingüística: Ames, Arteixo, Boiro, Noia, O Grove, Vilagarcía de Arousa, Cangas, A Estrada, Monterroso, Vilalba, Mondoñedo, Barbadás, Ourense e O Carballiño. As datas e horas de cada unha das sesións poden consultarse no Portal da Lingua Galega, así como na Axenda de Cultura de Galicia.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR