Mañá venres día 20 de novembro, ás 12h, a Facultade de Comunicación da USC acollerá o lanzamento do DVD da película A Esmorga, acto no que participarán o director, Ignacio Vilar; o produtor exectuvio Víctor Freixanes; e máis os actores protagonistas Miguel de Lira, Karra Elejalde e Antonio Durán Morris. Despois da presentación, o equipo manterá un coloquio co estudantado da USC e do IES de Santiago de Compostela.

Logo dos éxitos colleitados desde a súa estrea, a longametraxe A Esmorga, producida por Vía Láctea Filmes, Editorial Galaxia e TVG; dirixida por Ignacio Vilar; e co-protagonizada por Miguel de Lira, Karra Elejalde e Antonio Durán "Morris", sairá á venda en DVD xusto un ano despois da súa estrea nas salas de cinema galegas.

O citado DVD, que inclúe contidos extras coma a posibilidade de ver o filme con comentarios do director ou unha conferencia sobre a novela de Eduardo Blanco Amor e o filme, entre outros, estará á venda en grandes superficies, librerías, papelerías e quioscos de toda Galicia así coma en liña a partir do 20 de novembro.

Ademais, o seu lanzamento virá arroupado por unha ambiciosa campaña de publicidade e de promoción que inclúe actos de sinatura de exemplares por parte do director e os actores protagonistas nas principais cidades galegas entre o 19 e o 21 de novembro:
Xoves 19/11: Lugo (CC As Termas), de 17h00 a 18h30.
Xoves 19/11: Noia (Hipermercado Eroski), de 20h30 a 21h30.
Venres 20/11: Ourense (CC Ponte Vella), de 19h30 a 21h00.
Sábado 21/11: A Coruña (FNAC), de 12h00 a 14h00.
Sábado 21/11: Santiago (El Corte Inglés), de 17h00 a 18h00.
Sábado 21/11: Vigo (El Corte Inglés), de 19h30 a 21h00.

Deste xeito, Ignacio Vilar, Miguel de Lira, Karra Elejalde e Antonio Durán "Morris" asinarán DVDs a todos aqueles espectadores que desexen ter nas súas mans unha obra clásica personalizada e avalada por un extraordinario recoñecemento tanto do público como da crítica:

Premio ao Mellor Director, Ignacio Vilar; Mellor Interpretación Masculina, ex aequo Miguel de Lira, Karra Elejalde e Antonio Durán "Morris"; Mellor Fotografía, Diego Romero Suárez-Llanos, Festival Cinespaña, Toulouse (Francia).
2º filme máis visto por media por copia en España na fin de semana da súa estrea
15 semanas na carteleira galega
9 semanas na carteleira en Barcelona
Nominación a un Premio Goya (Mellor Guión Adaptado) por primeira vez para un filme rodado en galego
"Soberbias interpretacións", The Hollywood Reporter
"Pura pulsión", Javier Tolentino, RNE.

Uso de cookies

Este sitio web utiliza cookies para que vostede teña a mellor experiencia de usuario. Se continúa navegando está dando o seu consentimento para a aceptación das mencionadas cookies e a aceptación da nosa política de cookies, clique na ligazón para máis información. sobre as cookies

ACEPTAR