Nova edicion dos Encontros de Verines

Categoría: Nova

Un ano máis celebraranse os Encuentros en Verines, unha tradicional cita literaria que desde o ano 1985 reúne na Casona de Verines, en Pendueles (Asturias) a destacados creadores das distintas literaturas e linguas do Estado español. Os Encuentros están organizados polo Ministerio de Cultura e contan coa colaboración do Instituto Etxepare, o Institut Ramón Llull, e o Consello da Cultura Galega. O evento foi presentado onte pola mañá no Ministerio de Cultura, en Madrid, e o acto contou coa presenza de Ramón Villares, presidente do Consello da Cultura Galega.

Os Encuentros en Verines teñen por obxectivo "propiciar o intercambio intelectual entre escritores de todas as linguas de España, para debater sobre o estado das letras nos seus distintos xéneros e con diferentes enfoques".

Por parte galega participarán Luisa Castro, Suso de Toro, Víctor F. Freixanes e Miguel A. Murado, canda recoñecidos escritores doutras linguas do Estado como Xuan Bello, José María Merino, Carme Riera, Miren Agur, Luís García Montero, Soledad Puértolas, Jon Juaristi ou Luis Mateo Díez, entre outros. Están organizados por Víctor García de la Concha.

O programa deste ano propón unha reflexión sobre os últimos trinta anos das letras no Estado a partir do propio aniversario dos Encuentros.

A presenza galega será visible en mesas como 'O diálogo entre as linguas', na que participará Víctor F. Freixanes, '30 anos de poesía', que contará coa presenza de Luisa Castro ou de 'Linguas e Pensamento', na que falará Suso de Toro. A presenza galega complétase coas reflexións de Miguel A. Murado na mesa 'El Filandón, relatos e outras ficcións'.

Comparte nas túas redes sociais ou por email