O acto foi presentado por Víctor F. Freixanes, quen destacou a importancia que ten para Galaxia contar cunha das voces máis consolidadas da narrativa galega actual. A encargada de comentar a novela foi a profesora de Lingua Galega e Literaratura do IES Rosais II de Vigo, Ana Gago González. Foi introducindo os personaxes e situándonos no mundo que Riveiro Coello construiu ao longo deses catro libros que conforman a historia, iso si, sen desvelar nada das tramas que atrapan os lectores. O autor explicou o longo e duro proceso de seis anos que lle levou escribir -e corrixir- este complexo libro no que seguen estando presentes moitas das claves da súa literatura: a memoria, a culpa, o amor e os xogos metaliterarios.
Deixámosvos aquí algunhas imaxes desta xornada que rematou con Riveiro Coello asinando exemplares da novela.
